మరో 6 నెలల వరకు ప్రస్తుత విదేశీ వాణిజ్య విధానమే

దిల్లీ: విదేశీ వాణిజ్య కొత్త విధానం అమలును మరో 6 నెలలు వాయిదా వేసి, ప్రస్తుత విధానాన్నే  కొనసాగించాలని ప్రభుత్వం నిర్ణయించింది. అంతర్జాతీయ అనిశ్చితులు, కరెన్సీలో ఒడుదొడుకుల కారణంగా ఈ నిర్ణయం తీసుకుంది. విదేశీ వాణిజ్య ప్రస్తుత విధానం ఈ నెల 30తో ముగియాల్సి ఉంది. ప్రస్తుత పరిస్థితుల్లో కొత్త విధానం వద్దని పరిశ్రమ సంఘాలు, ఎగుమతుల ప్రోత్సాహక మండళ్లు నుంచి వినతులు వచ్చినట్లు వాణిజ్య శాఖ అదనపు కార్యదర్శి అమిత్‌ యాదవ్‌ చెప్పారు. కొత్త ఆర్థిక సంవత్సరంలోనే కొత్త ఆర్థిక విధానాన్ని తెస్తే బాగుంటుందనే అభిప్రాయాన్ని  వాళ్లు వెలిబుచ్చారని తెలిపారు. ఈ ఆర్థిక సంవత్సరం అంతా ప్రస్తుత విదేశీ వాణిజ్య విధానమే కొనసాగుతుందని తెలిపారు.