close

సంపాదకీయం

మరెంతో చేయాల్సిన ఈసీ

నేరస్వామ్యానికి నారూనీరూ పోస్తున్న పార్టీల వివేక భ్రష్టత్వం, భారత ప్రజాతంత్ర సంవిధానానికి పెను సవాళ్లు రువ్వుతోంది. ‘బయట మనం తలెత్తి చూడటానికి సైతం సిగ్గుపడేవాళ్లతో భుజం, భుజం రాసుకొని తిరగాల్సి వస్తోంది’ అని ఉపరాష్ట్రపతిగా కృష్ణకాంత్‌ ఆవేదన చెందిన రెండు దశాబ్దాల తరవాత- పెనం మీద నుంచి పొయ్యిలో పడ్డ చందంగా పరిస్థితి తయారైంది. జైళ్లలో మగ్గుతున్నవాళ్లను చట్టసభలకు నెగ్గిస్తున్న పార్టీల దుందుడుకుతనానికి బ్రేకులేసేలా ‘సుప్రీం’ న్యాయపాలిక ఇటీవల వెలువరించిన ఆదేశాలే- స్వచ్ఛ రాజకీయాల కోసం పరితపించేవారికి ఆశాదీప కళికలవుతున్నాయి. ‘సుప్రీం’ ఉత్తర్వుల అనుసారం- ఎన్నికల బరిలోకి దిగే అభ్యర్థులందరూ తమ నేరచరిత వివరాల్ని విధిగా నామినేషన్‌తోపాటు సమర్పించాలి. దానితోపాటు నేరచరిత వివరాల్ని ప్రచార ఘట్టంలో ముద్రణ, ఎలక్ట్రానిక్‌ ప్రసార మాధ్యమాల ద్వారా ముమ్మార్లు నియోజకవర్గ జనావళికి తెలిసేలా ప్రకటనలు ఇవ్వాలి. పార్టీలు సైతం తాము నిలబెట్టే అభ్యర్థుల ‘ఘనకార్యాల’ చిట్టాను జనావళి ఎదుట ముమ్మార్లు ఏకరువు పెట్టాల్సిందేనని సుప్రీంకోర్టు గిరిగీసింది. ప్రస్తుత అయిదు రాష్ట్రాల ఎలెక్షన్ల నుంచే ఆ నిబంధనల అమలు మొదలైందంటున్న ఎన్నికల సంఘం- నిర్దేశిత పద్ధతిలో నేరచరిత వివరాల వెల్లడికి కూడి రాని పార్టీలు, అభ్యర్థుల్ని ఉపేక్షించే ప్రసక్తి లేదంటోంది. ఎవరైనా తప్పుడు సమాచారం ఇచ్చిన పక్షంలో భారత శిక్షాస్మృతిలోని సెక్షన్ల కింద జరిమానా విధిస్తామన్నది ఈసీ హెచ్చరిక! కరడుకట్టిన నేరగాళ్ల కూసాలు కదిలించేలా బహుముఖ కార్యాచరణ పదును తేలాల్సి ఉండగా- జరిమానాలు, కోర్టు ధిక్కార కేసుల హెచ్చరికలతో ‘సుప్రీం’ ఆదేశాల స్ఫూర్తిని నిలబెట్టడం సాధ్యపడుతుందా? నేరగ్రస్త అభ్యర్థుల చీకటి చరిత్రల్ని ఎన్నికల సంఘమే వెలికి తీసి ఓటర్ల ముందు పెట్టడం- సరైన పద్ధతి. డిజిటల్‌ విప్లవ ఫలాల్ని అందిపుచ్చుకొని, ఓటర్లలో చైతన్యాన్ని ఇనుమడింపజేయడం ద్వారా చట్టసభల్లో నేరగాళ్ల ప్రవేశాన్ని నిషేధించేలా ఎన్నికల సంఘమే కార్యకుశలత చాటాలి! 
పోనుపోను భారత ప్రజాతంత్రం పరిణతి సాధిస్తుందన్న తొలితరం నేతల ఆకాంక్షలకు, ప్రస్తుత వాస్తవ దుస్థితిగతులకు అసలు పొంతన, పోలికా ఉందా? స్వాతంత్య్ర స్వర్ణోత్సవాల సందర్భంగా ‘అజెండా ఫర్‌ ఇండియా’కు కట్టుబాటు చాటిన పార్టీలు, నేరగాళ్లను దూరం పెడతామన్న వాగ్దానానికి పాతరేసి, జాతి విశాల హితాన్ని బలిపీఠం మీదకు నెట్టేసి ఇష్టారాజ్యంగా సాగించిందంతా- కుటిల రాజకీయ దందా! దుశ్శాసన సంతతిని రాజకీయ పక్షాలు ముద్దు చెయ్యడం మానితే పరిస్థితి గణనీయంగా తేటపడుతుందంటూ ‘పార్టీలు ఆ మాత్రం చెయ్యలేవా’ అని రాష్ట్రపతిగా నారాయణన్‌ సూటిప్రశ్న సంధించారు. మంచి అభ్యర్థిని ఎంచుకోవడం పౌరుల ప్రజాస్వామ్య హక్కు అంటూ అభ్యర్థులకు సంబంధించిన కీలక సమాచారం అంతా వారికి వెల్లడి కావాలని 2002లో ‘సుప్రీం’ చరిత్రాత్మక ఆదేశాలు ఇవ్వగానే- నేరగాళ్లకు చట్టబద్ధ రక్షాకవచాలు తొడగడానికి అపూర్వ ఏకీభావంతో పార్టీలు ఏకతాటి మీదకు ఎలా వచ్చిందీ జాతి జనులకు తెలుసు! నాడు సుప్రీంకోర్టు గట్టిగా తలంటేసరికి అభ్యర్థుల నేరచరిత, ఆస్తి అప్పుల వంటివి నామినేషన్లతోపాటు ఈసీకి చేరుతున్నా- ఎవరేమిటన్నది ఓటర్లకు తెలియకుండానే పార్టీలు ఇన్నేళ్లూ చక్రం తిప్పుతూ వచ్చాయి. కాబట్టే పద్నాలుగో లోక్‌సభలో 24శాతం, తదుపరి సభలో 30శాతం, ప్రస్తుత సభలో 34శాతం నేరచరితులకు పార్టీలు పీఠాలు వెయ్యగలిగాయి. ఈ దుర్మార్గాన్ని నిలువరించాలంటూ దాఖలైన ప్రజాప్రయోజన వ్యాజ్యాల్ని పరిష్కరిస్తూ, రాజ్యాంగబద్ధ లక్ష్మణ రేఖల్ని మీరకుండానే- తమ నేరమయ గతాన్ని అభ్యర్థులు, వారిని నిలబెట్టిన పార్టీలు ప్రసార సాధనాల ద్వారా ఓటర్లకు ఎరుకపరచాల్సిందేనంటూ న్యాయపాలిక ఇచ్చిన తీర్పు ఎంతో ఉత్కృష్టమైనది. అన్ని విధాలుగా వ్యవస్థకు చెరుపు చేస్తున్న ఈ కలుపును పీకి పారేసేలా పౌరసైన్యం కదలాలంటే, ఈసీ తన బాధ్యతను మరింత నిష్ఠగా నిర్వహించాలి!
స్వేచ్ఛగా సక్రమంగా ఎన్నికల నిర్వహణ అన్నది ఎలెక్షన్‌ కమిషన్‌కు దఖలుపడిన రాజ్యాంగబద్ధ విధి. ప్రజాస్వామ్య కుంభమేళాగా వాసికెక్కిన ఎన్నికల మహా క్రతువు మొదలయ్యాక, ఎలాంటి వాద వివాదాల్లోనూ న్యాయపాలిక సైతం జోక్యం చేసుకోని తీరు- ఓట్ల పండుగ పవిత్రతకే పట్టం కడుతోంది. నిర్ణీత కాలావధిలో ఎన్నికల నిర్వహణతోనే తన బాధ్యత తీరిపోయినట్లేనని ఈసీ అనుకోవడం సరికాదు. నేరగ్రస్త రాజకీయాలన్న విషమ సమస్య దశాబ్దాలుగా దేశాన్ని రాపాడుతున్నప్పుడు- స్వీయ పరిధిలో తాను ఏం చేయగల వీలుందో నిర్వాచన్‌ సదన్‌ పరిశీలించిన దాఖలాలు లేవు! నేరం, నేరగాళ్ల ఆచూకీని కనిపెట్టే అనుసంధాన వ్యవస్థల్లో (సీసీటీఎన్‌ఎస్‌) భాగంగా డిజిటల్‌ పోలీస్‌ పోర్టల్‌ను కేంద్ర ప్రభుత్వం నిరుడు ప్రారంభించింది. దేశంలో ఏ ప్రాంతానికి చెందిన ఏ నేరగాడి సమగ్ర సమాచారాన్ని అయినా క్షణాల్లో కళ్లకు కట్టే డిజిటల్‌ పోలీస్‌ పోర్టల్‌- గూగుల్‌ తరహా అధునాతన సెర్చ్‌ ఇంజిన్‌తోను, విశ్లేషణాత్మక నివేదికలిచ్చే సామర్థ్యంతోనూ పనిచేస్తుందని కేంద్ర సర్కారు ప్రకటించింది. ఎన్నికల్లో నేరగ్రస్త అభ్యర్థులకు సంబంధించిన వాస్తవాల నిర్ధారణకు ఈ పోర్టల్‌ ఈసీకి ఎంతగానో అక్కరకొస్తుంది. లజ్జాకర నిర్వాకాల్ని దాచిపెట్టినవాళ్లపై తరవాత ఎప్పుడో కేసులు పెడతామనే బదులు- ఈసీయే అభ్యర్థుల గుణదోషాల్ని నిక్కచ్చిగా వెలికితీసి, ఎవరు ఏమిటన్నదానిపై ఓటర్ల అవగాహన స్థాయిని పెంచాలి. అసమగ్ర సమాచారం ఇచ్చి, ‘అశ్వత్థామ హతః కుంజరః’ చందంగా స్వీయ నేరాల్ని కప్పిపుచ్చి చట్టసభల్లో అడుగు పెట్టాలనుకొనే ఘరానా నేరగాళ్ల దుస్సాహసాల్ని మొదలంటా తుంచాలి!

జిల్లా వార్తలు

    ఎక్కువ మంది చదివినవి (Most Read)

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Powered By Margadarsi Computers
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions | Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.